Ўзбекистон – АҚШ савдо-иқтисодий ҳамкорликнинг янги имкониятлари

Ўзбекистон Республикаси Инвестициялар, саноат ва савдо вазири Лазиз Кудратов АҚШга ташрифи доирасида АҚШ Савдо вазирининг ўринбосари, АҚШ Савдо вакилининг ўринбосари, Жаҳон Банки вице-президенти билан учрашди, шунингдек, Американинг йирик компаниялари раҳбарияти билан музокаралар олиб борди.

Учрашувлар чоғида Ўзбекистон учун GSP+ дастурининг бенефисиар мақомини қайта тиклаш, мамлакатимизнинг ЖСТга аъзо бўлиши бўйича ишчи гуруҳнинг 7-йиғилишини ташкил қилиш, икки томонлама савдо муносабатларида тўсиқларни бартараф этишга мўлжалланган қўшма маслаҳат платформасини яратиш доирасида ҳамкорликни фаоллаштиришга ҳамда инвестицияларни ўзаро ҳимоя қилиш ва икки томонлама солиққа тортишдан сақланиш бўйича ҳукуматлараро битимларни тайёрлаш юзасидан музокаралар жараёнини бошлашга келишилди.

Шунингдек, “яшил масалалар кун тартиби”, “инсон капиталини ривожлантириш”, хусусий секторни қўллаб-қувватлаш, давлат-хусусий шериклик механизмларини жорий қилиш, иқтисодиётда давлат ролини камайтириш, хусусийлаштириш ҳамда кичик ва ўрта бизнесни ривожлантириш каби устувор йўналишларда ҳамкорликни чуқурлаштириш режалаштирилди.

Америка кийим-кечак ва поябзал ассоциацияси, Старлинк, Медтрониc, Cолоуризд, Пфизер, Б2Голд, Морган Станлей, Акин Гумп, Cерберус Фронтиер ва бошқа йирик компаниялар раҳбарияти билан ҳам музокаралар олиб борилди.

Банклар, кимё корхоналари ва уяли алоқа компанияларини хусусийлаштириш, инновацион ваксиналар ишлаб чиқариш, қуёш ва шамол электр стансияларини қуриш, Ўзбекистон тўқимачилик саноатига илғор технологиялар ва дастурий таъминотни жорий этиш лойиҳаларини амалга ошириш мақсадида тўғридан-тўғри АҚШ инвестицияларини жалб қилиш масалалари келишиб олинди.