- 05.11.2023
- Posted by: Timur Abdugaffarov
- Category: Янгиликлар
Жорий йилнинг 3 ноябрь куни Самарқандда ишбилармон доиралар вакиллари ўртасидаги алоқаларни кенгайтириш ва мустаҳкамлаш, мавжуд муаммоларни муҳокама қилиш учун шарт-шароит яратиш ва қўшма сармоявий ташаббусларни амалга ошириш учун ўсиш нуқталарини аниқлашга қаратилган ХВИ Верона Евроосиё иқтисодий форуми ўз ишини бошлади.
Форумда Ўзбекистон, Европа ва Осиё мамлакатларининг вазирлик ва идоралар, тармоқ бирлашмалари, молия институтлари, хўжалик бирлашмалари раҳбарлари, шунингдек, 450 дан ортиқ компаниялар раҳбарлари иштирок этмоқда.
Очилиш маросимида тадбирнинг савдо-иқтисодий, сармоявий ва маданий ҳамкорликни ривожлантиришдаги ўрни, Европа ва Осиё мамлакатлари ўртасида азалдан савдо-иқтисодий марказ бўлиб келган қадимий Самарқандда ўтказилаётганининг аҳамияти таъкидланди. Давлат Раҳбарларининг мурожаатларида минтақадаги барча давлатлар манфаати йўлида иқтисодий алоқаларни янада ривожлантиришга тайёрлик билдирилди.
Икки кун давом этадиган форум доирасида халқаро иқтисодий алоқалар, савдо, сармоявий ва саноат кооперацияси, энергетика ва экологияга оид муҳокамалар бўлиб ўтади.
Нуфузли форумда йирик компанияларнинг юқори мансабдор шахслари, давлат ва жамоат арбоблари, экспертлар, дипломатлар, турли халқаро ва минтақавий ташкилотлар вакилларининг маърузачилар сифатида иштирок этиши томонларнинг энг устувор масала ва мавзулар бўйича ҳозирги позициясини аниқлаш, шунингдек, узоқ муддатли истиқболга мўлжалланган кўп томонлама савдо-иқтисодий ва сармоявий ҳамкорликнинг янги ўсиш нуқталарини аниқлаш имконини беради.